गान्तोक, 1 नोभेम्बरः लोकसभा सांसद इन्द्रहाङ सुब्बाले यस वर्षको दशैँ पश्चिम सिक्किमको भारत-नेपाल सीमामा सशस्त्र सीमा बल र सिक्किम पुलिसका जवानहरूसित मनाए।
यसअवसरमा उनले भारत-नेपाल सीमा क्षेत्रमा अवस्थित एसएसबी-का विभिन्न आउटपोस्टसँगै चिवाभञ्ज्याङ्गमा अवस्थित सिक्किम सशस्त्र बल एवं सिक्किम पुलिस आउटपोस्टको भ्रमण गर्नका साथै जवानहरूसित भलाकुसारी गरे।
सांसदले आफ्नो सामाजिक सञ्जालमा यसको जानकारी गराएका छन्।
आफूले जवानहरूसित विभिन्न विषयमा कुराकानी गरेको बताउँदै उनले 3 हजार मिटरको उँचाइमा प्रतिकूल परिस्थितिबीच जवानहरूले देश सुरक्षाका लागि देखाएको जोश सराहनीय रहेको बताएका छन्।
