मिरिक, १ नोभेम्बरः चियाबारी, हाम्रो चियाबारी र वरदान साहित्यिक पत्रिकाका सम्पादक कुमार रसाइलीको स्मरणमा प्रतिवर्ष प्रदान गरिने कुमार रसाइली साहित्यिक पत्रकारिता पुरस्कार मङ्पूबाट प्रकाशित हुने निषाद र हस्ताक्षर साहित्यिक पत्रिकाकी सम्पादिका सुभद्रा बम्जनलाई प्रदान गरिने भएको छ।
सुभद्रा बम्जनले मङ्पू साहित्य संस्थानको साहित्यिक पत्रिका निषादको निष्ठापूर्वक सम्पादन गर्नाका साथै निजी प्रयासमा मङ्पूबाट साहित्यिक पत्रिका हस्ताक्षर प्रकाशित गरिरहेकी छन्।
भारतीय साहित्यिक पत्रकारिताको क्षेत्रमा निष्ठापूर्वक योगदान पुऱ्याए वापत उनलाई कुमार रसाइली साहित्यिक पत्रकारिता पुरस्कारले अलङ्करण गरिने सूचना कुमार साहित्य प्रतिष्ठान, मिरिकको पक्षबाट कुमार कर्म (स्मृति ग्रन्थ) का प्रमुख सम्पादक कृष्ण प्रधानले विज्ञप्तिमार्फत् जानकारी दिएका छन्।
यस पुरस्कार अलङ्कारणअन्तर्गत पुरस्कृत स्रष्टा सुभद्रा बम्जनलाई अङ्गवस्त्र, कदर-पत्रका साथै नगद राशि प्रदान गरिइनेछ भन्ने कुरो पनि विज्ञप्तिमा जनाइएको छ।
यो पुरस्कार अलङ्कार आँउदो ९ नोभेम्बरका दिन कृष्णनगर (मिरिक) को सदभावना प्रेक्षागृहमा कुमार रसाइलीको पुण्यतिथि साथै उनको स्मृतिमा प्रकाशित स्मृति ग्रन्थ कुमार कर्म लोकार्पण समारोहमा प्रदान गरिने भन्ने पनि विज्ञप्तिमा उल्लेख गरिएको छ।
