कालेबुङ, 1 दिसम्बरः हिजो (सोमबार) बेलुकी करिब 5 बजी राष्ट्रिय राजमार्ग-10 अन्तर्गत् 27 माइलमा वाहन दुर्घटना हुँदा दुई महिलाको घटनास्थलमै मृत्यु भएका छन् भने अन्य तीनजना गम्भीर घाइते भएका छन्।
प्राप्त जानकारीका अनुसार हिजो दक्षिण सिक्किमको नाम्चीस्थित चारधाम घुमेर वीरपाड़ा फर्किरहेको बेला राष्ट्रिय राजमार्गस्थित 27 माइलमा डब्ल्यूबी 72 एच 6855 नम्बरको डस्टर गाड़ी दुर्घटनाग्रस्त हुँदा दुई महिलाको घटनास्थलमै मृत्यु हुनका साथै अन्य तीनजना घाइते भएका हुन्।
पुलिसका अनुसार यस दुर्घटना परी ज्यान गुमाउनेहरूमा रेखा अग्रवाल (37) र गिन्नी देवी अग्रवाल (62) रहेका छन्। त्यहीं कमल मित्तल र उनका दुई छोरा कुशल अग्रवाल (16) र राहुल अग्रवाल (14) गम्भीर घाइते भएका छन्। दुर्घटनामा पर्ने पाँचैजना एकै परिवारका हुन्।
दुर्घटनाको सूचना पाएलगत्तै घटनास्थलमा पुगेको पुलिसले स्थानीय मानिसहरूका सहयोगमा उद्धार कार्य गरेको थियो। घाइतेहरूलाई उपचारका लागि सिलगढ़ी पठाइएको छ।
