नयाँ दिल्ली, 2 जनवरीः फेम इन्डिया म्यागजिन-एशिया पोस्टले देशका 25 श्रेष्ठ सांसदको सूची जारी गरेको छ, जसमा दार्जीलिङका युवा सांसद राजु बिष्ट पनि परेका छन्।
प्रभावशाली, उत्कृष्ट, योग्य, असरदार, ऊर्जावान, अनुभवी, प्रेरक, कर्मठ, विलक्षण, कर्तव्यनिष्ठ, व्यक्तित्व, लगनशील, अग्रदूत, विशिष्ट, मजबुत, कर्मयोद्धा, व्यवहार कुशल, सफल, आइकन, दूरदर्शी, चर्चित, उद्देश्यपूर्ण, सक्रिय, जिम्मेवार र जागरूक आदि श्रेष्ठ 25 सांसदको सूची फेम इन्डिया-एशिया पोस्टद्वारा जारी गरिएको हो।
राजु बिष्ट श्रेष्ठ आइकन सांसद छनोट भएका छन्।
विभिन्न प्रश्न, संसदीय क्षेत्रको विचार, विधायिका र मिडियाजड़ित मानिसहरूबीच सर्वेक्षण र लोकसभाबाट प्राप्त डाटाको आधारमा श्रेष्ठ 25 सांसद छनोट गरिएको बताइएको छ।
अर्कोतिर, बिष्टले यो सम्मान दार्जीलिङ पहाड़, तराई अनि डुवर्सका मानिसहरूप्रति समर्पण गरेका छन्।
साथै क्षेत्रका मानिसहरूका मायाकै कारण यो सम्मान सम्भव बनेको पनि उनले बताएका छन्। “मैले सांसद निर्वाचित भई संसदमा पुगेको पहिलो दिनदेखि क्षेत्रका समस्याहरूको उठान र समाधानका लागि इमानदार र समर्पित भएर कार्य गरिरहेको छु”, बिष्टले भनेका छन्, “यो सम्मानले मेरो क्षेत्र र क्षेत्रवासीका लागि थप कठोर परिश्रम गर्न प्रेरित गरेको छ। साथै मैले क्षेत्रवासीलाई गरेका सबै प्रतिज्ञा पूरा गर्नेछु।’’
