कालेबुङ, 3 नोभेम्बरः कालेबुङ शहरदेखि केही टाढ़ास्थित पन्बुमा मङ्गलवार झिसमिसेमा भीषण सड़क दुर्घटना भएको छ, जुन सड़क दुर्घटनामा परी दुईजना यात्रीले ज्यान गुमाएका छन् भने अन्य 5 जना घाइते भएका छन्।
ज्यान गुमाउनेहरूमा याङ ग्राम पञ्चायतअन्तर्गत पन्बुनिवासी पदम माया छेत्री (६७) र समथार गैरीगाउँनिवासी रामबहादुर भुजेल (५७) छन्। रामबहादुर भुजेल वाहनका मालिक हुन्।
पुलिसका अनुसार पदम माया छेत्रीको घटनास्थलमा तथा रामबहादुर भुजेलको मृत्यु कालेबुङ सदर अस्पतालमा भएको हो।
यो दुर्घटनामा भुजेलकी पत्नी खिन माया भुजेल (५०), ठूला छोरा वाहन चालक हरिप्रसाद भुजेल (३०) र साना छोरा पलमान भुजेल (२५) घाइते भएका छन्। त्यसैगरी घाइते हुनेहरूमा रण माया भुजेल (४३) र दिपेन भुजेल छन्। रण माया भुजेल र दिपेन भुजेल आमा-छोरा हुन्। पुलिसका अनुसार घाइते हुनेहरू सबै समथारनिवासी हुन्।
जानकारीका अनुसार पन्बुबाट समथारतर्फबाट गइरहेको डब्ल्यूबी ७३ सी-६६०६ बलेरो पिकअफ भ्यान पन्बुनजिक १६ माइलमा दुर्घटना भएको हो। पुलिसका अनुसार बिहान करिब २:३० बजे उक्त पिकअप भ्यान दुर्घटनामा परेको हो। पुलिसका अनुसार वाहनमा आठजना यात्री सवार थिए।
