सिलगढ़ी, ३ मई: उत्तर बङ्गाल, सिक्किम र नेपालका कलाकारहरू सम्मिलित रहेको प्रसिद्ध सङ्गीत ब्याण्ड ‘वाणी’-ले पहिलोचोटि अस्ट्रेलियाका दुई प्रमुख शहरमा कार्यक्रम प्रस्तुत गर्नेछ। यो कार्यक्रमका लागि वाणी टोली शुक्रबार अपराह्न अस्ट्रेलिया पुगिसकेको छ।
‘म त जाने हो म्यूजिकल नाइट अनि तपाइँ नि!’ नामक साङ्गीतिक कार्यक्रममा ब्याण्डका मुख्य गायक पुष्पन प्रधान, बास गिटारिस्ट देवेन्द्र गौतम काँकरभिट्टा (नेपाल), कीबोर्ड तथा मेण्डोलिन वाधक एवं सङ्गीतकार जीवनप्रकाश प्रधान (दार्जीलिङ) प्रमुख गिटारवादक आमोस मुखिया-(खरसाङ) र ड्रमर नरेन बरदेवा (गान्तोक) आज शनिबार मेलबर्नको मेक्स वाट, १२५ स्वानस्टोन स्ट्रीटमा प्रस्तुति दिनेछन्।
वाणीका सदस्यहरूले पहिलोचोटि अस्ट्रेलियामा कार्यक्रम प्रस्तुत गरिरहेका छन्। यो कार्यक्रममा नेपाल आइडलका निर्णायक कालीप्रसाद बास्कोटाले पनि मञ्च साझा गर्नेछन्।
कार्यक्रमबारे टोलीका सदस्य तथा म्यानेजर देवेन्द्र गौतमले भने, “यो कार्यक्रमको आयोजन स्मार्ट एक्सिस इन्टरटेनमेन्ट अस्ट्रेलियाद्वारा गरिएको हो, जहाँ वाणी र द श्याडो ब्याण्डले प्रस्तुति दिनेछन्।” अस्ट्रेलियामा उनीहरूले दुईवटा कार्यक्रम गर्नेछन्। जसअन्तर्गत आज मेलबर्न र आगामी १० मईको दिन सिडनीको लिभरपुल स्ट्रीटमा हुनेछ।
