दार्जिलिङ, ५ फरवरीः भारतीय गोर्खा प्रजातान्त्रिक मोर्चाले आज दार्जिलिङ नगरपालिकाको चुनाउका उम्मेदवारहरूका पहिलो सूची जारी गरेको छ।
पहिलो सूचीमा ३२ मध्ये २५ उम्मेदवारको नामको घोषणा गरेको छ।
रहल ७ उम्मेदवारको नामको घोषणा पनि चाँडै गरिने बताइएको छ।
आज पार्टी अध्यक्ष अनित थापाले २५ उम्मेदवारको नामको घोषणा गरेका हुन्।
साथै नगरपालिकाका अध्यक्ष पदको उम्मेदवार अमर लामालाई बनाइएको छ।
पार्टीको महासचिव पदमा रहेका लामा वार्ड नम्बर २४ –बाट चुनाउ लड्नेछन्।
त्यसैगरी दार्जिलिङ नगरपालिकाकी पूर्व अध्यक्ष प्रतिभा राईलाई यसपटक पनि पार्टीले टिकट दिएको छ। राई वार्ड नम्बर २३ बाट चुनाउ लड्नेछिन्।
अर्कोतर्फ वार्ड नम्बर ७ की पूर्व वार्ड पार्षद् सोनाम शेर्पालाई पनि त्यसै वार्डबाट पुनः खडा गरिएको छ।
यसैबिच पार्टी अध्यक्ष अनित थापाले उम्मेदवारहरूका नामको घोषणा गर्दै सबैले चुनाउ जित्ने विश्वास व्यक्त गरे।
सम्बन्धित सबै वार्डका समाजहरूको परामर्श लिएरै यी उम्मेदवारहरूलाई चुनाउमा खडा गरिएको उनले बताएका छन्। आज पहिलो सूचीमा घोषित अन्य उम्मेदवाहरूमा वार्ड नम्बर १ –बाट दोर्जी डुक्पा, वार्ड नम्बर ३-बाट पेमा छोडेन, वार्ड नम्बर ५ –बाट दिवस थापा, वार्ड नम्बर-६ बाट उषा थापा, वार्ड नम्बर-८ बाट नवीन लामा, वार्ड नम्बर ९-बाट अर्पणा दर्नाल, वार्ड नम्बर- ११ बाट नामग्याल भोटिया, वार्ड नम्बर १२ –बाट सुधा छेत्री, वार्ड नम्बर १५-बाट उषा राई, वार्ड नम्बर १६-बाट लिला छेत्री, वार्ड नम्बर १७-बाट नीतेश गुरुङ, वार्ड नम्बर १८-बाट नौसाद रहमान, वार्ड नम्बर १९-बाट टाशी ओङ्मु भोटिया, वार्ड नम्बर २२-बाट पुरणबहादुर गुरुङ, वार्ड नम्बर २६-बाट मुकुन्दराज बराइली, वार्ड नम्बर २७-बाट जैन बर्देवा, वार्ड नम्बर २८-बाट साङ्मु लेप्चा, वार्ड नम्बर २९-बाट बुद्धहरि थापा, वार्ड नम्बर ३०-बाट विनीता प्रधान, वार्ड नम्बर ३१-बाट पमेन छिरिङ र वार्ड नम्बर ३२-बाट विजय गजमेर रहेका छन्।
