राईलाई भेटेरै दिए विष्टले धन्यवाद : भने – तपाईंहरूको समर्थनले मेरो जीत अझ निश्चित भएको छ

दार्जीलिङ, 5 अप्रेल : क्रान्तिकारी मार्क्सवादी कम्युनिस्ट पार्टी (क्रामाकपा)-ले भाजपा उम्मेदवार राजु विष्टलाई समर्थनको घोषणा गरेको छ। यो घोषणा गरिएको केही घण्टै नबित्ने बिजनबारीको जनसभाबाट फर्किरहेका विष्टले क्रामाकपाका अध्यक्ष आरबी राईलगायत अन्य पदाधिकारीहरूलाई भेट गरी समर्थनका लागि आभार प्रकट गरे।

भाजपा उम्मेदवार दार्जीलिङस्थित क्रामाकपाको पार्टी कार्यालयमा नै पुगेका थिए। त्यहाँ राईलगायत केन्द्रिय कमिटीका सबै नेतृत्व उपस्थित थिए।

उम्मेदवार राजु विष्टलाई समर्थन जनाउँदै र शुभकामना दिँदै क्रामाकपा अध्यक्ष आरबी राईले खदार्पण गरे। त्यस्तै विष्टले पनि राईलाई खदा लगाएर आभार प्रकट गरे।

यसअवसरमा दुवै नेताबीच संक्षिप्त कुराकानी पनि भयो। राईको पार्टी क्रामाकपाले समेत समर्थन गरेपछि उत्साहित बनेका विष्टले भने, ‘‘तपाईंजस्ता संसदीय प्रणालीको अनुभव भएका व्यक्तिको पार्टीले समर्थन गरिदिँदा म अत्यधिक खुशी भएको छ। यो समर्थनले मेरो जीत अझ निश्चित भएको छ। म मेरो जीतप्रति ढुक्क बनेको छु।’’

यसअवसरमा गोजमुमो प्रवक्ता बीपी बजगाईं पनि उपस्थित थिए। उनले पनि पार्टीको पक्षमा क्रामाकपालाई धन्यवाद दिएका छन्।