 |
| एयरभ्यू मोडस्थित होटल, जहाँ युवतीले आत्महत्या गरेकी थिइन्, इन्सेटमा युवतीको शव। |
सिलगढ़ी, 5 सेप्टेम्बर : सिलगढ़ीको एयरभ्यू मोडनजिक रहेको एक होटलबाट कोलकाता निवासी एक युवतीको शव बरामद भएपछि सनसनी फैलिएको छ। पुलिस सूत्रका अनुसार युवतीले गलामा पासो लगाएर झुण्डिरहेको अवस्थामा पाइएको थियो। मृतक कोलकाताको यादवपुरनिवासी पायल चक्रवर्तीको रूपमा चिन्हित भएको छ। मङ्गलवार राति पायल सिलगढ़ीको उक्त होटलमा बसेकी थिइन्। कोठा लिँदा उनले आफू कोलकाताबाट आएकी र गान्तोक जाने बताएकी थिइन्। युवती होटलको 14 नम्बर रूममा बसेकी थिइन्।
बुधवार बिहान होटलका कर्मचारीहरूले युवतीलाई धेरैपटक बोलाउँदा पनि युवतीले कुनै प्रतिक्रिया जनाइनन्। यसपछि सन्देह लागेर होटलपक्षले घटनाबारे पुलिसलाई जानकारी गरायो। पुलिस आएर कोठा खोल्दा झुण्डिरहेको अवस्थामा पायलको शव बरामद भयो।
यसैबीच पायलका घर परिवारलाई घटनाबारे जानकारी गराइएको छ। पुलिसले युवतीको मृत्युको पछि के कारण छ त्यसलाई पत्तो लगाउनका लागि जाँच कार्य शुरु गरेको छ। साथै कोलकाताबाट युवती किन एकलै सिलगढ़ी आइन्, यसबारे पनि पुलिसले जाँच गरिरहेको छ।
स्मरणरहोस्, केही दिनयता सिलगढ़ी तथा यसको संलग्न क्षेत्रमा आत्महत्याको घटनामा लगातार वृद्धि भइरहेको छ। मङ्गलवार मात्र सिलगढ़ीका तीन बेग्ला बेग्लै स्थानमा तीनवटा आत्महत्याको घटना प्रकाशमा आएको थियो।
