सिलगढ़ी, ६ दिसम्बरः शिलङ मेघालयनिवासी लेखक सलिल ज्ञवालीलिखित चर्चित पुस्तक ग्रेट माइन्ड्स अन् इन्डिया अब असमिया र संस्कृत भाषामा पनि अनुवाद हुँदैछ।
असमिया भाषामा अनुवाद असम सरकारकै तत्परमा हुँदैछ। केही दिनअघि यस पुस्तकका लेखक ज्ञवालीले असमका मुख्यमन्त्री हेमन्त विश्व शर्मासँग भेट गरेका थिए।
त्यस भेटवार्तामा मुख्यमन्त्री शर्माले ग्रेट माइन्ड्स अन् इन्डियाको धेरै प्रशंसा गर्दै आद्योपान्त पढ़्ने बताएका थिए।
ज्ञवालीले जानकारी गराएअनुसार सर्वानन्द सोनोवाल असमका मुख्यमन्त्री छँदै यस पुस्तकलाई असमिया भाषामा अनुवाद गर्ने स्वीकृति पाएको थियो, तर कोविड महामारीका कारण यस कार्यमा ढिलो भएको हो।
अर्कोतर्फ, टोरोन्टो युनिभर्सिटी क्यानाडाकी एयर स्पेस इन्जिनियर(Air Space Engineer) डा. हेमा मुर्ती अनि शेरिडन कलेज ओन्टारियो क्यानाडाका डा. हर्ष ठाकुरले पनि ‘ग्रेटमा माइन्ड्स अन् इन्डिया’-लाई संस्कृतमा अनुवाद गर्नार्थ अनुमति मागेका ज्ञवालीले थप बताएका छन्।
उल्लेखनीय छ, देश-विदेशका लेखक र विद्वानहरूले धेरै चर्चा र प्रशंसा गरेको यो पुस्तक अहिलेसम्म पञ्जाबी र कन्नडलगायत देश-विदेशका १३ वटा भाषामा अनुवाद भइसकेको छ।
