दार्जिलिङ, ६ जनवरीः आज साँझ नयाँ दिल्लीमा केन्द्रीय गृहमन्त्री अमित शाहसँग भेटवार्ता गरेका सांसद राजु विष्टले केन्द्र सरकारले त्रिपक्षीय वार्ताको पहल सुरु गरिरहेको बताएका छन् ।
विष्टले भनेका छन् – सरकारले त्रिपक्षीय वार्ताको पहल सुरु गरेको छ । चाँडै वार्ताको मिति घोषणा गरिनेछ ।
भेटवार्तामा गृहमन्त्रीले केन्द्र सरकार, पश्चिम बङ्गाल र गोर्खा समुदायका प्रतिनिधिहरूलाई लिएर चाँडै वार्ता गरिने जानकारी गराएको विष्टले बताएका छन् ।
सांसदका अनुसार साथै दार्जिलिङ पहाडका जनतासँग सम्बन्धित सबै समस्या वार्ताको माध्यमद्वारा समाधान गर्ने प्रतिबद्धता गृहमन्त्री अमित शाहले दोहोऱ्याएका छन् ।
गृहमन्त्रीको भेटवार्तापछि विष्टले दाबी गरेका छन् – गृहमन्त्रालयले त्रिपक्षीय वार्ता जारी राख्ने तयारी गरिरहेको छ । वार्ताको मिति चाँडै घोषणा गरिनेछ ।
उल्लेखनीय छ, दार्जिलिङ पहाड तराई एवम् डुवर्सको समस्याको दीर्घकालीन समाधानका लागि अन्तिमपटक १२ अक्टोबर २०२१ मा त्रिपक्षीय वार्ता भएको थियो । त्यो वार्तापछि अर्को वार्ता त्यसै वर्षको दसैँ-तिहारपछि हुने भनिएको थियो, तर आजसम्म भएको छैन । त्यसबेला हुने भनिएको वार्ताको आश्वासन झुटै साबित भएको छ । त्यसैले पनि भाजपाको नियतलाई लिएर तिखो आलोचना भइरहेको छ ।
