कालेबुङ, ७ अक्टोबरः अचानक आगो लाग्दा गुडिरहेको वाहन जलेर खरानी भएको छ । यो घटना आज शुक्रबार बिहान करिब ११ बजे राष्ट्रिय राजमार्ग १० अन्तर्गत चित्रे छेउ भएको हो ।
जलेर खरानी भएको उक्त वाहनको नम्बर डब्ल्यूबी ७४ बीसी ४००१ रहेको छ ।
मल्ली पुलिस सूत्रका अनुसार सिलगढीनिवासी एक परिवार दक्षिण सिक्किमको नाम्ची घुमेर सिलगढीतर्फ फर्किरहेको समय चित्रे पुग्न केही अघि उनीहरू सवार उक्त वाहनमा हठात् आगो लागेको हो ।
सर्ट सर्किटका कारण आगो लागेको बताइएको छ ।
चालकले तत्काल सतर्कता अप्नाउँदै वाहन सवार चारैजनालाई बाहिर निकालेका थिए, जसका कारण ठूलो दुर्घटना हुनदेखि जोगिएको थियो ।
अर्कोतर्फ, चालकले वाहनका कागज-पत्र निकालेको भ्याएको तर अन्य सरसमान भने निकाल्न नभ्याएको बताइएको छ ।
