खरसाङ, 8 जनवरी : मङ्गलवार मङ्पूको बीचकमानस्थित भैसेटारमा भएको आगलागीमा स्थानीयवासी गौतम राईको घर जलेर स्वाहा भएको छ। आगलागीको यो घटना आज बिहान लगभग 11 बजे भएको बताइएको छ। सटसर्किटकै कारण राईको घरमा आगो लागेको अनुमान गरिएको छ। जतिबेला यो घटना घट्यो, त्यसबेला घरमा कोही थिएनन्।
घटनाका प्रत्यक्षदर्शीहरूले बताएअनुसार जतिबेला उनीहरूले राईको घरमा आगो लागेको थाहा पाए, त्यतिबेला घर आधासरो जलिसकेको थियो। काठको घर भएकोले पनि आगो तीव्र रूपले फैलिएको थियो।
यता, घटनाबारे पीड़ित राईले जानकारी गराएअनुसार घटनाको समय घरमा कोही थिएनन्। त्यससमय राई र उनकी श्रीमती काममा गएका थिए भने नानीहरू ट्युशन पढ़न गएका थिए। उनीहरूले लगाएको लुगाबाहेक अन्य कुनै सामग्री झिक्न पाएनन्। यो आलगालीमा घरभित्र रहेका सरसमान, रुपियाँ पैसा, गरगहनालगायत आवश्यक कागज-पत्र सबै जलेर खरानी भएको उनले बताएका छन्।
