सिलगढी, ८ जुलाईः साहित्यकार विमल खतिवडा ‘माइला’ अब हामीबिच सशरीर रहेनन् । हिजो (सोमवार) राति सिलगढीको एक नर्सिङ होममा उपचाराधीन अवस्थामा उनको निधन भएको हो ।
पारिवारिक सूत्रका अनुसार अचानक पेटसम्बन्धी रोगले सिकिस्त पारेपछि सिलगढीको एक नर्सिङ होममा भर्ती गरिएको थियो ।
साहित्यकार खतिवडा ४५ वर्ष पुगेका थिए ।
२२ जुलाई १९८० मा कालेबुङको पेदोङस्थित कास्योनमा जन्मेका साहित्यकार विमल खतिवडा ‘माइला’ केही वर्षदेखि सिलगढी बस्दै आएका थिए ।
उनी सिलगढीकै एक निजी विद्यालयमा शिक्षकका रूपमा कार्यरत् थिए । विमल खतिवडाको उडान खण्डकाव्य प्रकाशित छ । यो खण्डकाव्य २०२४ मा प्रकाशित भएको हो ।
यसबाहेक उनका फुटकर गजल र कविता विभिन्न पत्र पत्रिकामा प्रकाशित छन् ।
साहित्यकार खतिवडाको पार्थिव शरीरलाई पैतृकथलो कालेबुङ पेदोङ लगिँदै छ, जहाँ अन्तिम संस्कार गरिनेछ ।
उनले आफूपछि आमा-बाबा, श्रीमती र दुई छोरा छाडिगएका छन् । उनको निधनले नेपाली साहित्य जगत्मा शोक छाएको छ ।
