दार्जीलिङ, 8 सेप्टेम्बर : रेडियो सेलेसियनले आयोजन गरेको पत्र लेखनमा मिरिककी सतिका चामलिङ प्रथम भएकी छन्। प्रतियोगितामा शीर्ष पाँचजनालाई छनौट गरिएको थियो, जसमा दोस्रो सिलगढ़ीकी शितल श्रेष्ठ दोस्रो, बिजनबारीकी अनामिका गुरुङ तेस्रो, मिलिङकी रोशना तामाङ चौथो र पचेङ निवासी पुरण राई पाँचौं स्थानले ओगटे। रेडियो सेलेसियन 90.8 सोनादाले युवाहरूलाई नेपाली साहित्यको अध्ययन र भाषाको शुद्ध लेखनप्रति अभिरुचि बढ़ाउन यो प्रतियोगिता आयोजन गरेको हो। शनिवार विजयी प्रतियोगीहरूलाई लिएर उनीहरूको सोनादास्थित एक होटलमा पार्टी आयोजन गरिएको थियो।
रेडियो सेलेसियनले आरजे समीरले बताएअनुसार नेपाली भाषामा पत्र लेखनको खस्किँदो अवस्थालाई माथि उकास्न यो प्रतियोगिता आयोजन गरेको हो। रेडियो सेलेसियनले नेपाली भाषा-साहित्यलाई केन्द्र गरी धेरै कार्यक्रम आयोजन गर्दै आएको छ। प्रतियोगिताका सहभागीहरूले यसबाट नौलो अनुभव प्राप्त भएको बताएका थिए।
