दार्जीलिङ, 9 मार्च: आखिर को हुन् हम जाएगा? हम जाएगाको नाम सुन्नसाथै 80-को दशकको प्रसिद्ध नेपाली चलचित्र कुसुमे रूमालकी नायिका तृप्तिलाई आफ्नो जोक्स सुनाएर हसाउँदै गाड़ीमा चढ़ाएर लाने दलबहादुर गुरूङको अनुहार नै सबैको आँखाअघि आउँछ।
तर होइन, आखिर को हुन् हम जाएगा? यस्तो प्रश्न सोध्दै आज सार्वजनिक गरिएको पोस्टरमा पनि त्यस समय हम जाएगा वा दलबहादुर गुरुङले पहिरिएकै जस्ता फुर्के टोपी लगाएका पाँचजना कलाकारको फोटोलाई अघि ल्याइएको छ।
उक्त फोटो दार्जीलिङ पहाड़सँगै सिक्किमका हाँस्य कलाकारहरू क्रमैले प्रख्यात नाटक भानु-पालामा अभिनय गर्ने कलाकार पाला उर्फ ललित गोले, घाँसी उर्फ अरुण प्रकाश राई, सिक्किमका पत्रकार एवं एक प्रख्यात कलाकार हेमन्त गिरी, सुनको औंठीका कलाकारद्वय जीवन गुरुङ र देवराज शेर्पा सामेल छन्।
जसमध्ये एकजना हुन् हम जाएगा। जसमाथि आजदेखि वैष्णवी प्रोडक्शनले एक प्रतियोगिता नै शुरू गरेको छ । यस प्रतियोगितामा हम जाएगा को हुन् भन्नेबारे सही उत्तर दिनेलाई पुरस्कृत गरिने भएको छ।
वैष्णवी प्रोडक्डनले हाल हम जाएगा नामक चलचित्रको निर्माण गरिरहेको छ, जुन चलचित्र आउँदो मई महिनाभित्र दर्शकअघि ल्याउने वैष्णवी प्रोडक्शनले योजना बनाएको छ।
यसै चलचित्रका मुख्य पाँचजना कलाकारहरूलाई अघि राखेर आजदेखि को हुन् हम जाएगा? प्रतियोगिता शुरू भएको छ। यस प्रतियोगिताको पोस्टरको आज दार्जीलिङ प्रेस गिल्डमा विधिवत विमोचन गरियो।
यसबारे चलचित्र निर्माता आदित्य रायाले भने, ‘‘विगत केही वर्षदेखि वैष्णवी प्रोडक्शनको ब्यानरमा हम जाएगा चलचित्रको निर्माण भइरहेको छ, जसको सुटिङ पूर्ण भएर अहिले सम्पादनको काम धमाधम चलिरहेको छ।’’
यसैबारे थप जानकारी गराउँदै चलचित्र टोलीकी एक कार्यकर्ता सविता सङ्कल्पले भनिन्, ‘‘दार्जीलिङ टेलिभिजन, वैष्णवी प्रोडक्शनद्वारा निर्माण भइरहेको चलचित्र हम जाएगा प्रिमियर शो आउँदो अप्रेल महिनाभित्रै गरिने तय भएको छ। तर, यसअघि सम्पूर्ण दर्शका लागि एउटा रोमाञ्चक प्रतियोगिता शुरू गरिएको छ।’’
उनले भनिन्, ‘‘हालसम्म हामीले चलचित्र हम जाएगाको सुटिङ भएसम्म नै हम जाएगालाई लुकाएर राखेका थियौं। हम जाएगा को हुन्? भन्ने विषय गोप्य नै राखेका थियौं। यसैले आज हामीले यसै विषयलाई केन्द्र गरी चलचित्रका पाँच कलाकारहरू क्रमैले ललित गोले, हेमन्त गिरी, जीवन गुरुङ, देवराज शेर्पा र अरूण प्रकाश राईलाई अघि राखेर यो प्रतियोगिता शुरू गरेका छौं। किनभने, यी 5 जना कलाकारले नै हम जाएगा चलचित्रमा मुख्य भूमिका निर्वाह गरेका छन्।’’
सविता सङ्कल्पका अनुसार यसैले उनीहरूले आजदेखि यी पाँच कलाकारमध्ये को हुन् हम जाएगा? भन्ने प्रश्न राखेका दर्शकहरूका लागि वैष्णवी प्रोडक्शनको फेसबुक पेजमा प्रतियोगिता शुरू गरेका छन्।
उक्त पेजमार्फत् नै सही उत्तर दिने दर्शकहरूलाई यो चलचित्रको प्रिमियर शो-को टिकट अनि अन्य आकर्षक पुरस्कारहरू प्रदान गर्ने निश्चय गरेको पनि उनीहरूले जानकारी गराएका छन्।
यो प्रतियोगिता आउँदो 27 मार्चसम्म जारी रहनेछ भने 28 मार्चका दिन तीन विजेताको नाम चिट्ठाद्वारा घोषित गरिनेछ, जसलाई पुरस्कृत पनि गरिनेछ।
