गान्तोक, 10 जुलाई : बुधबार डब्ल्यूबी ७३ ई २९४० नम्बरको इनोभा राष्ट्रिय राजमार्ग-१० मा दुर्घटना भएको छ। पर्यटकहरू सवार रहेको उक्त वाहन अनियन्त्रित भएर सोझै टिस्टा नदीमा खसेको सेभोक पुलिस थाना सूत्रले बताएको छ। यद्यपि उक्त वाहनमा कतिजना यात्रु सवार थिए, त्यसबारे ठोस जानकारी पाइएको छैन। वाहनमा चालकसहित करिब तीन यात्रु सवार रहेको अनुमान गरिएको छ।
थाना सूत्रका अनुसार दुर्घटना आज करिब १२:३० बजे बाघपुल नजिक राष्ट्रिय राजमार्ग १० -मा भएको हो। वाहन सोझै टिस्टा नदीमा खसेकोले वाहन र यात्रुहरूको पत्तो लाग्न सकेको छैन।
घटनाबारे जानकारी पाएलगत्तै एनडीआरएफको टीम दुर्घटनास्थलमा पुगेर वाहन र यात्रुहरूलाई खोज्ने कार्यमा जुटेको छ। जानकारीका अनुसार दुर्घटनास्थबाट एक ट्रली ब्याग र चालकको परिचय-पत्र आदि बरामद भएका छन्। बरामद भएको परिचय-पत्रका अनुसार चालकको नाम राकेश राई हो।
