दार्जीलिङ, 11 अगस्त छ : गोर्खा राष्ट्रिय मुक्ति मोर्चा (गोरामुमो) -को दार्जीलिङ शाखा कार्यालयमा आइतवार घूम-जोरबङ्ग्लो समष्टिअन्तर्गत सातवटा प्रशाखा र 14 नम्बर वार्डलाई लिएर साङ्गठनिक सभा सम्पन्न भयो। समष्टि सभापति सञ्जय छेत्रीको अध्यक्षतामा बसेको बैठकमा पार्टीका केन्द्रिय सदस्य एमजे सुब्बा विशेष रूपले उपस्थित थिए। गोरामुमो मिडिया सेलका प्रभारी दिनेश साम्पाङले जानकारी गराएअनुसार साङ्गठनिक विस्तारहेतु तदर्थ समिति गठन र यसबारे चर्चा परिचर्चा गर्नका लागि आजको सभा बसिएको थियो।
सभाका वक्ताहरूले घूम-जोरबङ्ग्लो समष्टिमा साङ्गठनिक गतिविधिमा भोग्न परिरहेको समस्याबारे अवगत गराउँदै तदर्थ समिति गठन गर्नुको आवश्यकतामाथि प्रकाश पारेका थिए।
उनका अनुसार आज गठन गरिएको तदर्थ समितिमा सभापति सुजीत राई, उपसभापतिद्वय विजय सुब्बा र शरण गुरुङ, मूल सचिव मणि लामा तथा सहसचिवद्वय विक्रम छेत्री र कृष्ण तामाङलाई चयन गरिएको छ।
