सिलगढ़ी, 12 फरवरीः बुधवार बिहान सेवक रोडस्थित बेङ्गाल सफारीनजिक भएको सड़क दुर्घटनामा परी बाइक सवार पतिको घटनास्थलमै मृत्यु हुनका साथै पत्नी गम्भीर घाइते भएको बताइएको छ।
पुलिसका अनुसार ट्रकले धक्का दिँदा तपस सिंह र रानी सिंह सवार बाइक दुर्घटनामा परेपछि तपस सिंहको घटनास्थलमै मृत्यु हुनका साथै उनकी पत्नी रानी सिंह गम्भीर घाइते भएकी हुन्।
उनीहरू दक्षिण दिनाजपुरको रहेको पुलिसले बताएको छ।
जानकारीका अनुसार घाइते रानी सिंहलाई सिलगढ़ीको एक नर्सिङ होममा भर्ती गरिएको छ। दुर्घटनाबारे सूचना पाएपछि सेवक थानाका पुलिस घटनास्थलमा पुगेको थियो।
जानकारीका अनुसार आरोपी ट्रक दुर्घटनापछि भागेको छ। अनियन्त्रित ट्रकले बाइकलाई जोड़ले धक्का दिएर त्यहाँबाट चम्पट कसेको बताइएको छ। पुलिसले आरोपी ट्रकको पत्तो लगाउने कोशिश गरिरहेको बताइएको छ।
