सिलगढ़ी, 13 मई : शहरको भक्तिनगर थानाअन्तर्गत पर्ने इस्टर्न बाइपास नजिक आइतबार राति एक डम्परले ठक्कर दिँदा रमेश प्रधान नामक व्यक्तिको मृत्यु भएको छ। भक्ति नगर पुलिस सूत्रका अनुसार मृत प्रधान डुवर्सको केरन चियाकमान निवासी हुन्। हिजो राति इस्टर्न बाइपास संलग्न राय कलोनी मोड़मा एक डम्परले जोड़ले हिर्काउँदा उनको मृत्यु भएको हो।
पुलिसका अनुसार रमेश प्रधान स्थानीय राय कलोनी मोड़ क्षेत्रमा भाड़ाको घरमा बस्दै आएका थिए। जानकारीका अनुसार उनी स्थानीय एक होटलमा सुरक्षाकर्मीको रूपमा कार्यरत थिए।
सधैँजसो कामबाट फर्किरहेको बेला तीव्र गतिमा पछिबाट आएको डम्परले जोड़ले हिर्काउँदा प्रधानको घटनास्थलमा नै मृत्यु भएको भक्तिनगर पुलिसले बताएको छ।
उक्त दुर्घटनाको सूचना पाएलगत्तै भक्तिनगर पुलिस घटनास्थलमा पुगी शवलाई आफ्नो कब्जामा लिएर पोस्टमर्टमका लागि पठाइएको छ। पुलिसले आरोपी डम्परलाई पनि जफत गरेको छ भने डम्परका चालक भागेका छन्। पुलिसले मामिलाको छानबिन गरिरहेको छ।
