कोलकाता, १५ अप्रेलः कोरोनाका कारण कङ्ग्रेस उम्मेदवार रिजाउल हकको मृत्यु भएको छ। उनी मुर्शिदाबाद जिल्लाको समशेरगञ्ज विधानसभा समष्टिका उम्मेदवार थिए, जहाँ आउँदो २६ अप्रेलका दिन चुनाउ हुँदैछ।
जानकारीका अनुसार आज बिहान उनको मृत्यु भएको हो। कङ्ग्रेस सूत्रका अनुसार केही दिनअघि कङ्ग्रेस उम्मेदवार रिजाउल हक कोरोना सङ्क्रमित बनेका थिए। त्यसपछि उनी होम क्वारेन्टिनमा थिए।
यद्यपि उनको स्वास्थ्य अवस्था बिग्रेपछि स्थानीय एक प्राइभेट हस्पिटलमा भर्ना गरिएको थियो। त्यहाँ उनको स्वास्थ्य अवस्थामा सुधार नआएपछि कोलकाता रेफर गरिएको थियो।
रिजाउल हकको निधनमा कङ्ग्रेस अध्यक्ष अधीर रञ्जन चौधरीले गहिरो शोक प्रकट गरेका छन्। “उनको मृत्यु पार्टीका लागि ठूलो क्षति हो। उनले जीवनभरि पार्टीका लागि योगदान दिए। हामीलाई आशा थियो-उनी समशेरगञ्ज निर्वाचन क्षेत्रबाट विजयी हुनेथियो। उनको आत्माले शान्ति पाऊन्”, अधीर रञ्जन चौधरीले भनेका छन्।
