काठमाडौँ, १६ फरवरीः सिक्किमकी युवा लेखक एवम् अन्वेषक सन्ध्या सिङ्जाङ्गो सुब्बा नेपाली प्रतिभा पुरस्कार २०२५ -ले सम्मानित भएकी छन् ।
नेपाली प्रतिभा प्रतिष्ठान युकेद्वारा प्रदान गरिने यो प्रतिभा पुरस्कार हिजो काठमाडौँमा सम्पन्न एक कार्यक्रमबिच नेपाली साहित्यका वरिष्ठ कवि एवम् मुन्धुमविद् बैरागी काइँलाको करकमलबाट लेखक-अन्वेषक सुब्बालाई अर्पण गरिएको हो ।
पुरस्कारको राशि एक लाख रुपियाँ रहेको छ ।
सिक्किमको असमलिङ्जेनिवासी सन्ध्या सिङ्जाङ्गो सुब्बा लिम्बू भाषा –साहित्य र संस्कृतिको विकास र जर्गेनाका लागि प्रतिबद्ध युवा लेखक-अन्वेषक हुन् ।
मूलतः अङ्ग्रेजी भाषामा लेख्ने सुब्बाका अहिलेसम्म लिम्बू समन्स् – ए डाइरेक्टरी अव् लिम्बू समन्स् इन् सिक्किम (२०२२), याक्थुङ सिभिलाइजेसन (२०२३) र याक्थुङ मुन्धुमलोर (२०२४) गरी तीनवटा मौलिक र मुन्धुमविद् बैरागी काइँलालिखित चलित मुन्धुम र मुजिङ्मा खेयोङ्ना मुन्धुमलाई अङ्ग्रेजी भाषामा अनुवाद गरेकी छन् ।
उनी भन्छिन् – वरिष्ठ साहित्यकार एवम् मुन्धुमविद् आदरनीय बैरागी काइँलाले उनका एघारैवटा मुन्धुमको अनुवाद गर्ने मलाई अनुमति दिइसक्नु भएको छ । त्यसमध्ये दुईवटा मुन्धुम अनुवाद गरिसकेकी छु । अन्यको अनुवाद पनि निकट भविष्यमा गर्नेछु ।
प्रतिबद्ध युवा लेखक अन्वेषक सन्ध्या सिङ्जाङ्गो सुब्बा कविता पनि राम्रो लेख्नेगर्छिन् ।
