गान्तोक, १७ जनवरीः पश्चिम सिक्किममा वाहन दुर्घटना हुँदा पाँचजनाको मृत्यु भएको छ ।
यो मर्मान्तिक घटना आज बिहान लगभग ८.३० बजे योक्सम टासिडिङ निर्वाचन क्षेत्र अन्तर्गत चोङराङ-योक्सम सडकमा पर्ने लाङ खोलामा भएको हो ।
गेरेथाङबाट नेसातर्फ गइरहेको एसके ०२ पी ५९६६ नम्बरको अल्टो वाहन मूल सडकबाट लगभग पाँच सय फिट तल खस्दा अविकेसर दाहाल, अभिषेक दाहाल, चन्द्रबहादु मगर, कर्णबहादुर गुरुङ र जीवन कार्कीले ज्यान गुमाएका छन् ।
वाहन उनीहरू पाँचजना सवार थिए भने पाँचैजनाको घटनास्थलमा मृत्यु भएको छ । मृतकहरू आरिथाङ-चोङराङ ग्राम पञ्चायतअन्तर्गत नेसानिवासी हुन् ।
दुर्घटनाका कारण खुलिएको छैन ।
जानकारीका अनुसार घटनास्थलमा पुलिस र स्थानीय मानिसहरू पुगी सबै शव निकालेर पोस्टमर्टमका लागि गेजिङ अस्पताल पठाउने कार्य भइरहेको छ ।
