खरसाङ, १७ जनवरीः अलिपुरद्वारबाट सिटोङ घुम्न गइरहेका पर्यटक सवार वाहन दुर्घटना हुँदा एकजना महिला पर्यटक घाइते भएकी छन् ।
यो दुर्घटना आज अपराह्न लगभग १ बजे लाटपन्चर सडकमा पर्ने कर्मठको पैह्रोमा भएको हो । घाइते महिला पर्यटकलाई स्थानीय मानिसहरूले उद्धार गरी उपचारका लागि अस्पताल पठाइएका छन् ।
वाहनका चालक गोपाल भौमिकले बताएअनुसार कर्मठको पैह्रोमा वाहन चढ्न नसक्दा सबैजनालाई उतारेर पछिल्तिरको चक्कामा ढुङ्गा हालिरहेका समय यो दुर्घटना भएको हो ।
उक्त वाहनको दैलो ती महिला पर्यटकलाई लाग्दा उनी मूल सडकबाट तल लडेकी थिइन्, जसका कारण यी महिला पर्यटक घाइते भएकी हुन् ।
भाग्यवश यो घटना भएका समय वाहनबाट सबै पर्यटक ओर्लिसकेका कारण थप ठुलो दुर्घटना हुनबाट जोखिएको थियो ।
उल्लेखनीय छ, लाटपन्चर र संलग्न क्षेत्रका लागि कर्मठको पैह्रो गाढे घाउ नै बनेको छ ।
सडकका दुवैतर्फ गएको पैह्रोले सडक साँघुरो मात्र छैन, तर अत्यन्त जोखिमपूर्ण पनि बनेको छ ।
प्रतिवर्ष बर्खा याममा पैह्रो झर्ने र दबिने गरेको कर्मठको पैह्रोमा भएर यातायात गर्नु कष्टप्रद हुनेगरेको छ।
