दार्जीलिङ, १७ अगस्त : देशका लागि थप एकजना गोर्खाले आफ्नो प्राणको आहुति दिएका छन्। शनिवार बिहानै पाकिस्तानी गोलीबारीमा उत्तराखण्डको देहरादुन निवासी लेन्सनायक सन्दीप थापा शहीद बनेका छन्।
जानकारीका अनुसार ३/५ गोर्खा राइफल्सका लेन्स नायक थापा देहरादुनको राजावाला गाउँनिवासी थिए। गोलाबारी बिहानै ६:३० बजे भएको बताइएको छ।
सूत्रका अनुसार ३५ वर्षीय थापा पाकिस्तानी गोलीबारीमा गम्भीर घाइते भएका थिए। उपचारअवधि उनको मृत्यु भएको बताइएको छ। उनी पछिल्लो १५ वर्षदेखि भारतीय सेनामा सेवारत थिए।
थापा रजौरी जिल्लाको नौसेरा सेक्टरमा तैनाथ थिए। आज बिहानै पाकिस्तानी सेनाले युद्धविरामको उल्लङ्घन गर्दै भारतीय सेना र ग्रामीणहरूलाई लक्षित गरी गरेको गोलीबारीमा लेन्सनायक थापा शहीद बनेका हुन्।
प्राप्त जानकारीका अनुसार आइतवार शहीद थापाको पार्थिव शरीर देहरादुन पुऱ्याइनेछ। भोलि नै उनको पूर्ण सैनिक सम्मानसहित अन्तिम संस्कार गरिने पनि बताइएको छ।
