कालेबुङ, 18 मार्चः हिजो लोहापुलनजिक सुन्तलेमा भएको वाहन दुर्घटनामा थप एक पर्यटकको मृत्युको छ।
दुर्घटना परी गम्भीर घाइते भएकी डली दास (52)-को सिलगढ़ीको आनन्दलोक नर्सिङ होममा उपचाराधीन अवस्थामा आज बिहान मृत्यु भएको बताइएको छ। मृतक दास पश्चिम बङ्गालको नदियानिवासी रहेको बताइएको छ।
जबकि, दुई अन्य घाइते पर्यटक साई स्नेह रथ (9) र स्वेतापद्मा नन्द (37)-को भने उपचार चलिरहेको छ।
उल्लेखनीय छ, हिजो सिक्किमबाट एनजेपीतर्फ गइरहेको एसके 01 जे 2377 नम्बरको सुमो गोल्ड करिब 3.30 बजे सुन्तलेनजिक दुर्घटना हुँदा पाँचजना पर्यटकको घटनास्थलमै मृत्यु भएको थियो, जबकि अन्य तीनजना पर्यटक घाइते भएका थिए, जसमध्ये एक पर्यटक डली दासको आज बिहान मृत्यु भएको हो।
करिब एक साता अघि सिक्किम घुम्न आएका यी पर्यटकहरू हिजो आ-आफ्नो घर भुवनेश्वर फर्किरहेका थिए, तर राष्ट्रिय राजमार्ग 10 मा भीषण दुर्घटनामा परेका थिए।
उनीहरू चढ़ेको वाहन अनियन्त्रित भई मूल सड़कबाट करिब 100 फुट तल खसेको थियो।
स्मरणरहोस्, मृतक पाँचैजना पर्यटकको उत्तर बङ्गाल मेडिकल कलेज एवं अस्पतालमा पोस्टमर्टम गरिएको पुलिसले बताएको छ।
