जोरथाङ, १८ अक्टोबरः आज बिहानै दक्षिण-पश्चिम सिक्किमको सीमा नयाँ बजारस्थित अक्कर पुलमा एसके ०२ पी २७६६ नम्बरको अल्टो गाड़ी दुर्घटना हुँदा हि-मार्तमनिवासी ३६ वर्षीय वीरबल लिम्बू र हि-गाउँनिवासी ५१ वर्षीय जयमान लिम्बूको मृत्यु भएको छ।
मृतक दुवै सिक्किम आर्म्ड पुलिस (एसएपी)-का एएसआई पदमा थिए। उनीहरू दशैँको छुट्टीपछि हि-गाउँबाट आज बिहानै गान्तोकतर्फ गइरहेका थिए। तर उनीहरू सवार गाड़ी जसै दक्षिण-पश्चिमको सीमा नयाँबजारस्थित अक्कर पुल पुग्यो, डरलाग्दो दुर्घटनामा पऱ्यो।
यस दुर्घटनामा परी १९ वर्षीय फुङ्पुना लिम्बू, २१ वर्षीय फुङ्सोना लिम्बू र १९ वर्षीय सिजी हाङ्मा लिम्बू घाइते भएका छन्।
घाइते बनेका फुङ्पुना र फुङ्सोना लिम्बू मृतक जयमान लिम्बूकी छोरी हुन्। जानकारीका अनुसार गाड़ीलाई जयमान लिम्बूले चलाइरहेका थिए। घाइतेहरूका उपचार जोरथाङ अस्पतालमा चलिरहेको छ।
