 |
| क्रामाकपा प्रवक्ता गोविन छेत्री (फाइल फोटो)। |
दार्जीलिङ, १९ सेप्टेम्बर : राज्यकी मुख्यमन्त्री ममता ब्यानर्जीले दार्जीलिङलाई देशको संविधानबाहिर राखेर बङ्गालको उपनिवेशको रूपमा मनपरी गरिरहेको आरोप क्रान्तिकारी मार्क्सवादी कम्युनिस्ट पार्टी (क्रामाकपा)-ले लगाएको छ। क्रामाकपाका अनुसार मुख्यमन्त्री ममताले दार्जीलिङलाई लथालिङ्ग पार्न चाहन्छिन्, यसैले अहिले पहाड़मा देशको संविधान र कानूनलाई खुल्ला उपहास गर्दै अप्रजातान्त्रिक र अन्याय-अत्याचार मौलाएको छ।
बुधवार जनसंवादसँग कुराकानी गर्दै क्रामाकपाका प्रवक्ता गोविन छेत्रीले यस आशयको आरोप लगाएका हुन्। उनले भने, “मुख्यमन्त्रीले दार्जीलिङमा जे जति कार्य गर्दैछिन्, ती सबै गैरकानुनी र प्रजातान्त्रिक छन्। वास्तवमा उनले दार्जीलिङ पहाड़लाई बङ्गालको उपनिवेश ठान्छिन्। यसैले दार्जीलिङमा देशको संविधान र कानूनको कुनै अर्थै छैन।’’ छेत्रीले यो बयान जीटीएको सन्दर्भमा दिएका हुन्। उनका अनुसार पुनः जीटीएको बोर्ड अव् एड्मिनिस्टेटरको मियाद बढ़ाइ यो घोर अप्रजातान्त्रिक हुनेछ।
“क्रामाकपाले जीटीएलाई स्वीकार्दैन। यसले गोर्खाहरूको सपना र आकांक्षालाई पूरा गर्दैन’’, उनले थपे, “जनाकांक्षा विपरीत गठन गरिएको जीटीएको सञ्चालन अझ धेरै अप्रजातान्त्रिक र गैरकानुनी छ।’’ एक प्रश्नको उत्तरमा उनले दार्जीलिङको विषयमा मुख्यमन्त्रीसँग कुनै आँट र भरोसा नरहेको दाबी गरे। “पहाड़मा चुनाउ गरिए उनीहरूको विपक्षमा जनाधार जाने डर छ’’, क्रामाकपा प्रवक्ताले थपे, “यो डरले नै राज्यले दार्जीलिङमा जनताको मौलिक अधिकार हनन गर्ने कार्य गर्दैछ।’’
