गान्तोक, १९ अक्टोबरः दक्षिण सिक्किमको नाम्चीमा नवनिर्मित भाइचुङ स्टेडियमको उद्घाटन समारोह स्थगित गरिएको छ।
पूर्व कार्यक्रमअनुसार भाइचुङ स्टेडियमको उद्घाटन भोलि अर्थात २० अक्टोबरका दिन हुने थियो। तर खराब मौसमका कारण उपराष्ट्रपति भेङ्कैया नायडु भोलि सिक्किम आउन नसक्ने भएपछि भोलिको यो उद्घाटन समारोह स्थगित गरिएको हो।
राज्यको खेल तथा युवा मामिला विभागका सचिव राजु बस्नेतले जानकारी दिएअनुसार लगातार खराब मौसमका कारण उपराष्ट्रपतिको सिक्किम यात्रा स्थगित भएको हो।
उनले दिएको जानकारी अनुसार उपराष्ट्रपति कार्यालयले यो यात्रा अब २२ अक्टोबरमा हुने हुने पुष्टि गरेकाले भाइचुङ स्टेडियमको उद्घाटन समारोह पनि २२ अक्टोबरका दिन नै हुनेछ।
स्टेडियमको उद्घाटन मिति अलग रहे पनि समय र कार्यक्रममा कुनै फेरबदल नहुने सचिव बस्नेतले जानकारी गराएका छन्।
