सिलगढी, २२ जनवरीः पद्मश्री सम्मानले सम्मानित निपुण मादलवादक एवम् मादल अन्वेषक काजी सिंह विद्यार्थी अब हामीबिच सशरीर रहेनन् । हिजो राति सिलगढीको महाराजा अग्रसेन नर्सिङ होममा उपचाराधीन अवस्थामा उनको निधन भएको हो । उनी ८० वर्षको पुगेका थिए ।
पारिवारिक सूत्रका अनुसार उनको डायलसिस चलिरहेको थियो भने हिजै मात्र उनलाई महाराजा अग्रसेन हस्पिटलमा उपचारका लागि भर्ना गरिएको थियो ।
मादल वादन र अन्वेषणमा जीवन नै खिप्ती गरेका काजी सिंह विद्यार्थी २०२२ मा पद्मश्री सम्मानले सम्मानित भएका थिए । उनले मादल बजाउने, सिकाउने र त्यसमाथि अन्वेषण गर्ने कार्य मात्र गरेनन्, तर मादल र सङ्गीतविषयक अत्यन्त कामलाग्दा पुस्तक समेत लेखेका छन् । उनका मादल, सङ्गीत सरोवर, बिर्सिएको संस्कृति फेरि दोहोऱ्याऔँ, श्रीमादल शास्त्रीय र व्यावहारिक पक्ष र श्रीमादल कलानिधि प्रकाशित छन् ।
१९४५ मा दार्जिलिङको फुबछिरिङमा जन्मी जीवनको उत्तरार्द्धमा कालेबुङलाई स्थायी ठेगाना बनाएका काजी सिंह विद्यार्थीले ६०-का दशकमा हिन्दी चित्रपट सङ्गीत टोलीमा मादलेसमेत रहेका थिए ।
मुम्बईको चलचित्र उद्योगमा लक्ष्मीकान्त प्यारेलाल, कल्याणजी-आनन्दजी, राम-लक्ष्मण, शङ्कर जयकिशन, अजय स्वामी आदि सङ्गीतकारहरूलाई मादले बनी उनले साथ दिएका थिए । यद्यपि मुम्बई छाडेर उनी गान्तोक आई त्यहाँको प्रसिद्ध स्कुल टासी नामग्याल एकाडेमीका सङ्गीत शिक्षक बने र त्यहीँबाट २००५-मा सेवानिवृत्त भएका थिए ।
काजी सिंह विद्यार्थीले सङ्गीत भरेको गीत तिमी त रै’छौ मङ्गले गाउँको अत्यन्त लोकप्रिय छ । त्यसैगरी उनले सङ्गीत भरेका अन्य गीतहरूले पनि चर्चा कमाएका छन् । उनको निधनले सङ्गीत र साहित्य वृत्तमा शोकको लहर छाएको छ ।
सिक्किमका मुख्यमन्त्री प्रेम सिंह तामाङ गोले, सिक्किमका पूर्व मुख्यमन्त्री एवम् साहित्यकार पवन चाम्लिङ, दार्जिलिङका सांसद राजु विष्ट लगायत अन्यले पद्मश्री काजी सिंह विद्यार्थीको निधनप्रति गहिरो शोक प्रकट गर्दै शोकाकुल परिवारप्रति समवेदना प्रकट गरेका छन् ।
उनको छोरो पण्डित निशान्त सिंह पनि प्रवीण पखावज हुन् । भारतको चौथो सर्वोच्च सम्मान पद्मश्री सम्मानले सम्मानित निपुण मादलवादक एवम् प्रवीण मादल अन्वेषक काजी सिंह विद्यार्थीको निधनप्रति दार्जिलिङ टक्स गहिरो शोक प्रकट गर्दछ ।
