दार्जीलिङ, 23 अगस्तः देशको सुरक्षार्थ फेरि एकजना गोर्खाले आफ्नो प्राणको बलिदान दिएका छन्। शुक्रवार पाकिस्तानी सेनाले गरेको गोलीबारीमा गोर्खा राइफल्सका जवान राजीव थापा शहीद बनेका छन्।
उनी जम्मू-कश्मीरको रजौरी जिल्लास्थित नौसेरा सेक्टरमा तैनाथ थिए। शुक्रवार पाक सेनाले भारतीय सेनाको चौकी र ग्रामीण क्षेत्रलाई लक्षित गरी व्यापक गोलीबारी गरेको थियो, जसमा राजीव थापा शहीद भएका हुन्।
उल्लेखनीय छ, पछिल्लो एक साताको अवधिमा पाक गोलीबारीमा दुईजना गोर्खा सैनिकले आफ्नो प्राण देशका सुरक्षार्थ गुमाइसकेका छन्। यसभन्दा अघि देहरादुन निवासी 3/5 गोर्खा राइफल्सका लान्स नायक सन्दीप थापा शहीद भएका थिए।
