कालेबुङ, 24 अगस्तः केही दिनयता कालेबुङमा पुनः कोरोना सङ्क्रमणका मामिला थपिँदै गइरहेको छ। यसै क्रममा आज थप 8 जना कोरोना सङ्क्रमित पाइएको जिल्ला प्रशासन सूत्रले जानकारी गराएको छ।
जानकारीका अनुसार कोरोना सङ्क्रमित पाइएकाहरूमध्ये दुईजना टिस्टा, दुईजना कालेबुङ बोङबस्ती, एकजना कालीझोड़ा सीआईएसएफ र तीनजना एनएचपीसी ब्यारेकबाट रहेका छन्।
प्राप्त जानकारीका अनुसार पछिल्लो 21 अगस्तका दिन उनीहरूको स्वाबको नमूना सङ्ग्रह गरी जाँचका लागि पठाइएको थियो भने आज सबैको टेस्ट रिपोर्ट पोजिटिभ आएको हो।
उल्लेखनीय छ, राज्यको स्वास्थ्य विभागद्वारा जारी हेल्थ बुलेटिनका अनुसार हिजो अर्थात् 23 अगस्तसम्म कालेबुङ जिल्लामा कुल कोरोना सङ्क्रमितहरूको सङ्ख्या 402 पुगेको थियो, जसमध्ये 275 जना स्वस्थ भएर आ-आफ्नो घर फर्किसकेका छन् भने जिल्लामा एक्टिभ केस (सक्रिय मामिला) 124 रहेको थियो।
बुलेटिनका अनुसार अहिलेसम्म कालेबुङ जिल्लामा कोरोना भाइरसका कारण तीनजनाले ज्यान गुमाइसकेका छन्।
