कालेबुङ, २४ दिसम्बरः मङ्गलवार सखारै मल्ली थानाअन्तर्गत् किर्ने बजारनजिक भएको राष्ट्रिय राजमार्ग १० मा वाहन दुर्घटना हुँदा एकजनाको मृत्यु भएको छ।
मल्ली पुलिसका अनुसार सिलगढ़ीबाट सिक्किमतर्फ गइरहेको एसके ०१ डी ०९२३ नम्बरको मालवाहक ट्रक किर्ने बजारनजिक सात माइलमा दुर्घटना हुँदा चालकको घटनास्थलमा मृत्यु भएको हो।
मृतक चालकको नाम राजेश दियाली (३४) बताइएको छ। पुलिसका अनुसार तिनी कालीझोड़ास्थित २० माइलनिसानी हुन्।
त्यसैगरी, दुर्घटनामा परेको वाहन रानीपुल बजारनिवासी महेश कुमार अग्रवालको बताइएको छ। वाहन मूल सड़कदेखि करिब चार सय तल खसेको बताइएको छ।
उल्लेखनीय छ, केही दिनयता राष्ट्रिय राजमार्गमा एकपछि अर्को वाहन दुर्घटना भइरहेका छन्। आइतवार भोटे भिरनजिक बाइक दुर्घटना हुँदा ओदलाबारीनिवासी सुवास राईको घटनास्थलमै मृत्यु भएको थियो।
यसैगरी पछिल्लो ५ दिसम्बरको दिन बिहानै ०१ पीबी ४३१५ नम्बरको डस्टर कार किर्नेनजिक दुर्घटना हुँदा गान्तोक पानीहाउसनिवासी दिलबहादुर छेत्रीको मृत्यु भएको थियो।
