मिरिक, 28 अप्रेलः मिरिकको अप्पर सौरेनी बस्तीस्थित पानी गोलाइमा एक युवकको हत्या भएको घटना प्रकाशमा आएको छ।
मृतकका नाम सोङ्गेल तामाङ (20)-हो। मिरिक पुलिसले आरोपी रेशब राई (19)-लाई पक्राउ गरी खरसाङ चलान गरेको छ। पुलिसका अनुसार रेशब राईले रडले हिर्काएर सोङ्गेल तामाङको निर्मम हत्या गरेका हुन्। यो घटना हिजो राति करिब 8.30 बजी भएको बताइएको छ।
यी दुई युवकबीच भनावैरी हुँदा यो घटना भएको प्राथमिक जाँचमा पत्तो लागेको मिरिक पुलिसको भनाइ छ।
शवलाई आफ्नो अधीनमा लिएर पुलिसले पोस्टमर्टमका लागि उत्तर बङ्गाल मेडिकल कलेज एवं अस्पताल पठाइएको छ। यस घटना सम्बन्धमा पुलिसले थप अनुसन्धान गरिरहेको छ।
जानकारीका अनुसार मृतक सोङ्गेल तामाङ पुटुङनिवासी हुन्। केही दिनअघि हैदराबादबाट आएका उनी मामा निर्मल सुब्बाको घरमा बसेका थिए। घटनाको अनुसन्धान एएसआई सुरज कुमार लोहारले गरिरहेका छन्।
