दार्जीलिङ, ३० मार्चः निर्दलीय प्रार्थीका रूपमा दार्जीलिङ विधानसभा समष्टिबाट खड़ा भएका सुरज गुरुङ (धड़्कन)-ले आफूले सबै पार्टी र झण्डा सम्मान गर्ने तर कुनै पनि पार्टी र झण्डाको गुलामी भने नगर्ने बताएका छन्।
उनले आफ्नो आधिकारिक फेसबुक अकाउन्टमा लेखेका छन्, ‘यसपल्टको विधानसभा चुनाउमा उत्रेका पार्टीका उम्मेदवारहरूमध्ये एकैजना मात्र यस्ता उम्मेदवार देखाउनुस्; जसले आफू स्वयम् भुक्तभोगी भएर शिक्षा व्यवस्थालाई बुझेको छ; जसले आफू स्वयम् बेरोजगार भएर पलायन हुनपरेको अवस्थालाई बुझेको छ; जसले आफू स्वयम् चियाश्रमिक भएर चियाबारीको पीड़ालाई बुझेको छ; जसले वनबस्तीसित हातेमालो गरेर त्यहाँका समस्याहरू बुझ्ने प्रयास गरेको छ। लु एकैजना मात्र देखाउनुस्। कस्सम होला, म मेरो भोट पनि उसैलाई दिनेछु। तर पार्टीले उठाएको भन्दैमा पद र पैसाले मात्तिएका हेर्दै घमण्डी अनुहारकाहरूलाई म भोट हाल्न सक्दिनँ।‘
यसका साथै उनले आफ्नो उम्मेदवारितालाई एउटा हाँक, एउटा एउटा चुनौती, एउटा विद्रोह, एउटा आत्मसचेतता र परिवर्तनका लागि उठाएको स्वाभिमानी आवाज बताएका छन्।
