खरसाङ, 1 अगस्तः पछिल्ला केही दिनयता खरसाङ महकुमा क्षेत्रमा कोरोना भाइरसको मामिला लगातार बढ़िरहेको छ।
यसै क्रममा आज खरसाङ क्षेत्रमा थप 8 जना कोरोना सङ्क्रमित पाइएको छ, जसमध्ये दुईजना बाघगौंडास्थित एयर फोर्स स्टेशनका छन्। उनीहरूका उमेर क्रमैले 22 र 30 वर्ष रहेको बताइएको छ।
यसैगरी अन्य 6 जना खरसाङ नगरपालिकानिवासी हुन्, जसमा चारजना एकै परिवारका हुन्। यी परिवार नगरपालिकाको 18 नम्बर वार्डस्थित नयाँ बजारनिवासी रहेको बताइएको छ, जसमध्ये एकजनाको उमेर 11 वर्ष रहेको छ।
अर्कोतिर, 15 नम्बर वार्ड हिलकार्ट रोडनिवासी 42 वर्षीय पुरुष र 2 नम्बर वार्डस्थित अप्पर डुमाराम बस्तीनिवासी 33 वर्षीय युवक पनि कोरोना सङ्क्रमित रहेको पाइएको छ।
यसैबीच, कोरोना सङ्क्रमित पाइएका क्षेत्रहरूमा आज नगरपालिकाले सेनिटाइजेशन कार्य गरेको छ।
