खरसाङ, 8 सेप्टेम्बरः खरसाङका विधायक डा. रोहित शर्मा पुत्रशोकमा परेका छन्। उनका छोरा प्रज्ज्वल शर्मा (30)-को आज बिहान निधन भएको छ।
प्रज्ज्वल शर्मा केही महिनायता मेरुदण्डसम्बन्धी रोगले ग्रस्तित थिए। उनको उपचार चलिरहेको थियो।
यद्यपि उपचारकै क्रममा आज उत्तर बङ्गाल मेडिकल कलेज एवं अस्पतालमा उनको निधन भएको पारिवारिक सूत्रमार्फत् थाह लागेको छ।
मेकअप आर्टिस्टका रूपमा पोख्त प्रज्ज्वलले होटल म्यानेजमेन्टसमेत गरेका थिए। उनको आजै सिलगढ़ीस्थित किरणचन्द्र घाटमा अन्तिम संस्कार गरियो।
अर्कोतिर, विधायक शर्माका छोरा प्रज्ज्वल शर्माको निधनमा जीटीए बीओएका अध्यक्ष अनित थापा, गोजमुमो पहिलो खेमाका अध्यक्ष विमल गुरुङ र गोजमुमो दोस्रो खेमाका अध्यक्ष विनय तामाङले शोक व्यक्त गर्दै शोकाकुल परिवारप्रति समवेदना प्रकट गरेका छन्।
