गान्तोक, 22 नोभेम्बरः मुख्यमन्त्री पीएस गोलेले सिक्किममा पनि भोलिका दिनमा सचिन, कोहली र धोनीजस्ता क्रिकेटर जन्मने प्रशस्त सम्भावना रहेको मन्तव्य गरेका छन्।
यसका लागि बीसीसीआईले दिएका सुविधाहरूको सही उपयोग गरी यहाँका नानीहरूले मिहिनेत गर्नुपर्ने उनले बताए।
आज माइनिङमा सिक्किम क्रिकेट एसोसिएशनद्वारा आयोजित कञ्चनजङ्घा सिल्ड 2020 टुर्नामेन्टको फाइनल खेलको अवसरमा पत्रकारहरूसित कुराकानी गर्दै उनले यसो भनेका हुन्।
सिक्किम क्रिकेट एसोसिएशनका पूर्व अध्यक्ष रहेका मुख्यमन्त्री गोलेले बीसीसीआइ-को मान्यता पाएपछि सिक्किममा पनि क्रिकेट खेलको विकास द्रूत गतिमा भइरहेको बताए।
यो सिक्किमेली युवाहरूका लागि सुनौलो अवसर हो भन्दै उनले यसबाट फाइदा उठाएर राष्ट्रिय तथा अन्तर्राष्ट्रिय स्तरमा पुग्नका लागि खेलाड़ीहरूले पनि आफ्नो तर्फबाट कोशिश गर्नुपर्ने कुरामाथि मुख्यमन्त्रीले जोड़ दिएका छन्।
