कालेबुङ, 25 दिसम्बरः लाभा घुमेर गोरुबथानको बाटो भएर सिलगढ़ीतर्फ गइरहेको डब्ल्यूबी 74 एभी 3789 नम्बरको वेगनर गाड़ी गोरुबथान थानाअन्तर्गत् फापरखेतीको शुक्रबारेनजिक भीषण दुर्घटना हुँदा एकजनाको मृत्यु हुनका साथै दुइजना घाइते भएका छन्।
गोरुबथान थानाका ओसी सौरभ घोषले जानकारी दिएअनुसार यो दुर्घटना आज बेलुकी करिब 6: 30 बजी भएको हो।
जानकारीका अनुसार तीव्र गतिमा रहेको उक्त गाड़ी प्यारापेडमा ठोकिँदा दुर्घटना भएको हो। दुर्घटनाको खबर पाएलगत्तै स्थानीय मानिसहरूले तत्कालै उक्त गाड़ीबाट तीनैजनालाई निकालेका थिए।
घाइतेहरूलाई निकालेको केही क्षणमै गाड़ीमा डरलाग्दो आगो लागेको थियो। गाड़ी जलेर खरानी भएको छ।
गोरुबथान थानाका ओसी घोषका अनुसार दुर्घटनामा परेकाहरू सिलगढ़ीनजिक फूलबारीका वासिन्दा हुन्। अर्कोतिर, जानकारीका मृतकको नाम मोना बर्मा बताइएको छ। त्यसैगरी घाइतेहरूमा गोपाल सिह्ना र जगदीश रोय रहेका छन्।
