कालेबुङ, 4 जनवरीः कालेबुङमा ऱ्यापर लाहुरेको कार्यक्रममा भीड़ले कुल्चिँदा दुई महिलाको मृत्यु हुनका साथै पाँचजना घाइते भएका छन्।
मृतक महिलाद्वय अनिता छेत्री र बनिता गुरुङ रहेका छन्।
जानकारीका अनुसार अनिता छेत्री वार्निङ गोलाई तथा बनिता गुरुङ चन्द्रलोकनिवासी हुन्।
यो घटना हिजो राति कालेबुङको मेला ग्राउन्डमा भएको हो, जहाँ नेपालका चर्चित ऱ्यापर लाहुरे उर्फ आशिष राणा मगरलाई लिएर ‘म्याड डग’ नामक संस्थाले एक साङ्गीतिक कार्यक्रम आयोजन गरेको थियो।
लाहुरेको कार्यक्रम हेर्न अत्यधिक भीड़ जुटेको थियो।
जानकारीका अनुसार कार्यक्रमस्थलको मुख्यद्वार (गेट)-मा भीड़ जुटेको थियो।
यसैबीच, कार्यक्रमस्थलमा प्रवेश गर्न ठेलाठेल हुँदा यो घटना भएको बताइएको छ।
गम्भीर घाइते भएका दुईजनालाई उपचारका लागि कालेबुङ जिल्ला अस्पतालबाट सिलगढ़ी रेफर गरिएको छ भने अन्य तीनजना घाइतेको उपचार कालेबुङ जिल्ला अस्पतालमै भइरहेको छ।
