गान्तोक, १९ फरवरीः स्थापना दिवस समारोहलाई लिएर एसडीएफको समीक्षा सभा बसियो।
हिजो एसडीएफ भवनको प्रेक्षागृहमा पार्टीका वरिष्ठ उपाध्यक्ष तथा पूर्व मन्त्री गिरीशचन्द्र राईको अध्यक्षतामा बसिएको उक्त समीक्षा सभामा स्थापना दिवस समारोह समितिका अध्यक्ष तथा पूर्व मन्त्री जी.एम. गुरुङ, पार्टीका वरिष्ठ नेताहरू आर.बी. सुब्बा, डी.बी. थापा, दाउछो लेप्चा के.टी. ग्याल्छेनलगायत अन्य उपस्थित थिए।
आउँदो ४ मार्चका दिन एसडीएफले आफ्नो २९औँ स्थापना दिवस पालन गर्दैछ। यो स्थापना दिवसलाई भव्य रूपमा पालन गर्नका लागि विभिन्न विषयमाथि विस्तृत रूपमा छलफल गरिएको थियो।
प्रजातन्त्रलाई सफल र बलियो र सशक्त तुल्याउनका लागि पार्टीको २९औँ स्थापना दिवसमा सम्पूर्ण पार्टी कार्यकर्ता तथा सिक्किमेली जनगणलाई निमन्त्रणा दिएर भव्यताका साथै पालन गरिने आयोजक समितिले निर्णय गरेको छ।
