कालेबुङ, 26 अप्रेलः कालेबुङबाट सिलगढ़ीतर्फ गइरहेको डब्ल्यूबी 74 एपी 2839 नम्बरको बाइकमा सवार युवक 29 माइलनजिक राष्ट्रिय राजमार्ग 10-बाट बेपत्ता बनेका छन्।
पुलिसका अनुसार बेपत्ता बनेका युवकको नाम रोहित गुप्ता (25) हो। उनी सिलगढ़ी मतिगढ़ानिवासी रहेको बताइएको छ।
पुलिसका अनुसार यो घटना बेलुकी करिब 7.30 बजी भएको हो। रम्बी पुलिस र टिस्टा-रङ्गीत उद्धार केन्द्रको टोलीले खोजी गरे पनि यो समाचार तयार पारुञ्जेलसम्म युवकको कुनै पत्तो लाग्नसकेको थिएन।
ती युवक बाइकबाट उछिट्टिएर सोझै टिस्टामा खसेको हुनसक्ने पुलिसको आशङ्का छ। सड़क किनारमा लड़िरहेको अवस्थामा बाइक भेट्टाइएकोले पनि यस्तो आशङ्का गरिएको हो।
जानकारीका अनुसार आज रोहित गुप्ता र उनका केही साथी गाड़ीमा सवार भई बाइक किन्नका लागि कालेबुङ आएका थिए। बाइक किनेर अरू साथी गाड़ीमा र रोहित गुप्ता त्यसै बाइकमा सवार भई सिलगढ़ीतर्फ फर्किरहेका थिए। अरू साथी सवार भएको गाड़ी अघि अघि र रोहित बाइकमा पछि पछि थिए। तर 29 माइलनजिक पुग्दा रोहित अचानक बेपत्ता भए।
रोहितका साथीहरूका अनुसार उनीहरूले रोहितको फोन नम्बरमा धेरैपटक कल गरे, तर फोन लागेन। यताउता पनि खोजे, तर पाएनन्। सड़क किनारमा बाइक लड़िरहेको अवस्थामा भेटाएपछि रोहित बेपत्ता भएको बारे पुलिसलाई सूचित गरिएको पनि बताइएको छ।
