सिलगढ़ी, 2 मईः उत्तर बङ्गालमा उत्कृष्ट प्रदर्शन गरेको भारतीय जनता पार्टी दार्जीलिङ जिल्लामा क्लिन स्विप गरेको छ। दार्जीलिङ जिल्लाका पाँचवटै सिट भाजपाले जितेको छ।
यसैबीच दार्जीलिङ सांसद एवं भाजपाका राष्ट्रिय प्रवक्ता राजु बिष्टले विजयी बनेका भाजपा उम्मेदवारलगायत उनीहरूलाई जीत दिलाउनका लागि अथक र इमानदारीपूर्वक खटिने कार्यकर्तीहरूलाई बधाई दिएका छन्।
‘तपाईं (कार्यकर्ता)-हरूकै प्रयासका लागि दार्जीलिङ जिल्लाबाट तृणमूल कङ्ग्रेसलाई पूर्ण रूपले हटाएका छौँ। हाम्रो पार्टीले दार्जीलिङ जिल्लाका पाँचवटै सिट जितेको छ’, बिष्टले भनेका छन्, ‘हामी कालेबुङमा धेरै झिनो अन्तरले हारेका छौँ। तर दार्जीलिङ जिल्ला, तराई अनि डुवर्सका धेरैवटा सिटमा जीत दर्ता गरेका छौँ। तर यो त शुरुआत मात्र हो।’
यसका साथै भाजपाले क्षेत्रका जनतालाई दिएका आश्वासनहरू पूरा गर्ने दिशामा विजयी उम्मेदवारसँगै आफू पनि काम गर्ने उनले बताएका छन्।
यसैगरी, उनले बङ्गालमा जीतका लागि तृणमूल सुप्रिमो ममता ब्यानर्जी पनि बधाई दिएका छन्।
‘मलाई आशा छ, उनको सरकारले सबै क्षेत्र र जनताका विकासका लागि कुनै भेदभाव नगरी काम गर्नेछ’, राजु बिष्टले भनेका छन्।
Congratulations