खरसाङ, १७ मईः लोअर रमिते सोनादाका समाज सचेतक युवाहरूद्वारा गठित इन्द्रकमल परिवारले आफ्नो सामाजिक कार्यलाई निरन्तरता दिँदै आएको छ।
यसै क्रममा आज यस परिवारका सदस्यहरूले सोनादा डिग्री कलेज परिसर र यसका वरिपरि सरसफाइलगायत सेनिटाइजेशन कार्य गरे।
उल्लेखनीय छ, केही दिन अघि यस कलेजमा केन्द्रीय सुरक्षा वाहिनी आएर बसेको थियो भने कलेज परिसर र वरपर धेरै मैला भएको थियो। यसैले आज इन्द्रकमल परिवारका सदस्यहरूले सरसफाइ र सेनिटाइजेशनको कार्य गरेका हुन्।
हिजो पनि उनीहरूले गाउँकै बाटो सरसफाइका कार्य गरेका थिए। परिवारका सचिव कुसुम थापाले भनिन्, “आफ्नो क्षमताअनुसारै भए पनि सामाजिक कार्य गर्ने सोच राखेरै हामीले इन्द्रकमल परिवार गठन गरेका हौँ। यसै सोचलाई अघि बढ़ाएर हामीले यस प्रकारका सामाजिक कार्यहरू गर्दै आएका छौँ। र भविष्यमा पनि गरिरहने छौँ।”
