कालेबुङ, ४ सेप्टेम्बर: पेदोङको कटरेमा पैह्रोले पुर्दा ७५ वर्षीय वीरबहादुर मगरको मृत्यु भएको छ।
जानकारीका आज बिहान करिब ३.३० बजे पैह्रो गएको हो।
निर्माणाधीन राष्ट्रिय राजमार्गको कारण नै पैह्रो गएको स्थानीय मानिसहरूका भनाइ छ। माथिबाट झरेको पैह्रोले ती वृद्धको घरलाई पनि पूर्ण रूपमा क्षति पुऱ्याएको छ।
जानकारीका अनुसार अविवाहित वीरबहादुर मगर एक्लै बस्थे।
स्थानीय मानिसहरूको आरोपका अनुसार राष्ट्रिय राजमार्ग निर्माणका लागि खन्ने कार्य गरिँदा उनीहरूका सुझाउ र आपत्तिलाई सम्बन्धित विभाग र अधिकारहरूले बेवास्ता गरेकै कारण यस्तो दुःखद घटना भएको हो। सम्बन्धित निकायले यस विषयमा ध्यान दिनुपर्ने गाउँवासीको माग छ।
पेदोङ खण्ड विकास अधिकारी, पुलिस र पञ्चायतकर्मी कटरे पुगेर पैह्रोले गरेको क्षय-क्षतिको जानकारी लिएका थिए।
यस घटनाका कारण क्षेत्रका मानिसहरूमा पैह्रोको डर बढ़ेको छ।
शवलाई पोस्टमर्टमका लागि कालेबुङ जिल्ला अस्पताल पठाइएको छ।
