मिरिक, १४ अक्टोबरः आज बेलुकी करिब ७.३० बजे मिरिकको घैयाबारी ज्यामिरे गोलाईमा वाहन दुर्घटना हुँदा दुईजनाको मृत्यु हुनका साथै दुईजना घाइते भएका छन्।
त्यसैगरी अन्य दुईजना यात्री बेपत्ता बनेका छन्, जसको खोजी कार्य जारी छ। जानकारीका अनुसार दुर्घटनामा परेकाहरू एकै परिवारका सदस्यहरू हुन्। उनीहरू सिलगढ़ीनिवासी हुन्।
घटनास्थलमा मिरिक पुलिस पुगेर स्थानीय मानिसहरूको सहयोगमा उद्धार एवं खोजी कार्यमा जुटेको छ।
जानकारीका अनुसार वाहनमा चालकसहित ६ जना सवार थिए, जसमध्ये चारजनालाई उद्धार गरी उपचारका लागि मिरिक अस्पताल पठाइएको थियो, जसमध्ये दुईजनाको बाटोमै मृत्यु भएको बताइएको छ।
प्राप्त जानकारीका अनुसार दार्जिलिङबाट मिरिक हुँदै सिलगढ़ीतर्फ वेगनर गाड़ी मिरिक घैयाबारीस्थित ज्यामिरे गोलाई पुग्दा दुर्घटनामा परेको हो।
वाहन मूल सडकबाट करिब ५०० फुट मुनि खसेको बताइएको छ।
