-अजित विश्व
मिरिक, २८ अक्टोबरः मिरिकमा ठूलो चोरीको घटना प्रकाशमा आएको छ।
आज (बिहीबार) बिहान करिब ४ बजे चोरहरूका एउटा समूहले मिरिक बजारको इलेक्ट्रो दादा नामको पसलबाट ६ लाख ३० हजार ९ सय २ रुपियाँ बराबरका विभिन्न कम्पनीका ३१ वटा मोबाइल फोन चोरी गरेको छ।
यस पसलमा राखिएको सीसीटिभी क्यामेराका अनुसार बिहान करिब ४ बजे चोरहरूका एउटा समूहले खुबै चतुर्याइँपूर्वक मोबाइल चोरी गरेको छ। समूहमा लगभग ८ जना चोर रहेका थिए।
योजनाबद्ध तरिकामा चोरहरूले सटर बङ्गाएर पसलभित्र पसी त्यहाँ राखिएका मोबाइल फोनहरूसँगै लगभग तीस हजार रुपियाँ पनि लिएर चम्पट कसेका छन्।
चोरीको यो घटना सीसीटिभी क्यामेरामा कैद भएको छ भने घटनाबारे पसले मिरिक थानामा प्राथमिकता पनि दर्ता गरेको छ।
दर्ता प्राथमिकीका आधारमा मिरिक थानाले घटनाको जाँच शुरू गरेको छ। आज घटनास्थलमा मिरिक थाना प्रभारी सुदीप कुमार विश्वास पुगेर वस्तुस्थिति बुझेका थिए। उनले चोरहरूलाई चाँड़ै पक्राउ गरिने पनि बताए।
