कालेबुङ, १० नोभेम्बरः सिलगढ़ीबाट गान्तोकतर्फ गइरहेको डब्ल्यूबी ७३सी४९२५ नम्बरको बस मल्लीनजिक ६ माइल कोइरी जाने बाटो छेउ दुर्घटनामा परेको छ।
जानकारीका अनुसार आज राति करिब ७.३० बजे उक्त बस दुर्घटनामा परेको हो।
बस मूल सड़कदेखि करिब १०-१२ तल भिरमा अड़्केका कारण ठूलो दुर्घटना हुनदेखि जोगिएको थियो।
दुर्घटनामा परी एक महिला गम्भीर घाइते भएका छन् भने अन्यलाई सामान्य चोटपटक लागेको बताइएको छ। बसमा करिब ३० यात्री थिए।
घाइतेहरूलाई उपचारका लागि टिस्टा अस्पताल पठाइएको छ। दुर्घटनाको खबर सुन्नसाथै मल्ली पुलिस घटनास्थलमा पुगी स्थानीयहरूका सहयोगमा उद्धार कार्यमा जुटेको थियो।
जानकारीका अनुसार उक्त बसमा सवार अधिकांश दैनिक ज्यालामा काम गर्ने मजदुरहरू थिए।
