दार्जिलिङ, १६ नोभेम्बरः दार्जिलिङनिवासी कवयित्री योगिता राईको म्युजिक भिडियो तिमी समय रिलिज भएको छ।
आज प्रेसगिल्डमा आयोजित एक संक्षिप्त कार्यक्रमबिच यस म्युजिक भिडियो रिलिज गरिएको हो।
रोमा थापाको स्वरमा रहेको उक्त म्युजिक भिडियोमा सङ्गीत वरिष्ठ सङ्गीतकार प्रदीप छेत्री रहेका छन् सङ्गीत संयोजन राजेन तामाङले गरेका छन्।
कविता लेखनमा अघिबाटै चर्चा बटुलिसकेकी योगिता राईले लेखेकी यो पहिलो गीत हो।
तिमी समय म्युजिक भिडियोको रिलिजको अवसरमा शब्दकार योगिता छेत्री, सङ्गीतकार प्रदीप छेत्री, सङ्गीत संयोजक राजेन तामाङ, युवा बाँसुरीवादक सुमन लामिछाने, कला सङ्गम मञ्चका अध्यक्ष बिसन छेत्री आदि पनि उपस्थित थिएष
कार्यक्रमलाई साहित्यकार एवं पत्रकार सविता सङ्कल्पले सञ्चालन गरेकी थिइन्।
“कवयित्री योगिता राईले अत्यन्त उच्च स्तरीय शब्द लेखेकी छन्। मैले सङ्गीत गर्ने कोशिश गरेको छु”, सङ्गीतकार छेत्रीले थपे, “अत्यन्त उच्चस्तरीय शब्द भएकाले मैले न्याय गर्न सकिन कि भन्ने लागिरहेको छ।”
शब्द योगिता राईले स्रोताहरूबाट स्वस्थ प्रतिक्रियाको आशा राखेकी छन्।
“म मेरा शब्दलाई जबर्जस्ती मन पराइदिनुस् भन्दिनँ। स्रोताहरूले सुनेर स्वस्थ प्रतिक्रिया दिनेछन् भन्ने आशा राखेकी छु।” उनले यस गीतलाई स्रोताहरूसमक्ष पुऱ्याउन सहयोग गर्ने सबैप्रति आभार प्रकट पनि गरेकी छन्।
