सिलगढ़ी, ४ दिसम्बरः दान खालिङ साहित्य सम्मान-२०२१ वरिष्ठ साहित्यकार नरबहादुर दाहाललाई प्रदान गरिनेछ।
आज सालबारीमा बसिएको एक सभामा यस वर्षको दान खालिङ साहित्य सम्मान साहित्यकार नरबहादुर दाहाललाई प्रदान गर्ने सर्वसम्मतिले निर्णय लिइएको हो।
दान खालिङ साहित्य सम्मान सिलगढ़ी नेपाली साहित्य संस्थानले प्रतिवर्ष प्रदान गर्दै आइरहेको छ।
संस्थानका अध्यक्ष वासुदेव पुलामीले जानकारी गराएअनुसार संस्थानको स्थापना दिवस, गिरी तथा दान खालिङ जयन्तीको अवसर पारेर आउँदो २६ दिसम्बरका दिन साहित्यकार दाहाललाई यो सम्मान अर्पण गरिनेछ।
सम्मानका रूपमा उनलाई अङ्गवस्त्र, स्मृतिचिह्न र नगद राशि बीस हजार रुपियाँ खालिङ परिवारका वरिष्ठ सदस्यका करकलमबाट प्रदान गरिने थापाले थप बताएका छन्। चयन समितिमा साहित्यकार मोहन ठकुरी, राजकुमारी दाहाल अनि बिनेश प्रधान थिए।
